निर्वाचन आयोगले सूर्य चिन्ह ओली समूहलाई नै दिन्छ: नेता पोखरेल
सिन्धुली पुस २२ ।
उपप्रधानमन्त्री तथा नेकपा ओली समूहका नेता ईश्वर पोखरेलले निर्वाचन आयोगले सूर्य चिन्ह ओली समूहलाई नै दिने बताएका छन् ।
सिन्धुलीको सदरमुकाम सिन्धुलीमाडीमा आज नेकपा ओली समूहका अगुवा कार्यकर्ता भेलालाई सम्बोधन गर्दै उनले यस्तो बताएका हुन । साथै उनले सरकारले निर्वाचनको मिति घोषणा गरिसकेकाले निर्वाचनमा लाग्न कार्यकर्तालाई निर्देशन दिए ।
भेलालाई सम्बोधन गर्दै उनले निर्वाचनको तयारी सरकारले गरी रहेको पनि जनाकारी गराए । नेता पोखरेलेले नेकपा आधिकारिक रुपमा विभाजन नभएको भन्दै प्रधानमन्त्री केपी शर्मा ओलीले नेतृत्व गरेको पार्टी नै आधिकारिक पार्टी भएको दावी गरे ।
उनले निर्वाचनले नै लोकतन्त्र बलियो हुने र मतदाताको अभिमतको सुनिश्चितता हुने भएकाले आजैबाट निर्वाचनको तयारी थाल्न पनि आग्रह गरे ।
