सल्यानमा खोलाले बगाउँदा बालकको ज्यान गयो
सल्यान,साउन २४ । सल्यानमा खहरे खोलाले बगाउँदा एक बालकको ज्यान गएको छ ।
खोलाले बगाउँदा सल्यानको छत्रेश्वरी गाउँपालिका-४ झिम्पे जारढुङ्गाका १२ वर्षीय बालक ओमकार वलीको ज्यान गएको हो । खोलाले बगाउँदा बालककी ३२ वर्षीया आमा दिलसरा वली घाइते हुनुभएको छ ।
शनिवार बेलुका गोठालोबाट घर फर्किँदै गर्दा गोगनपानीमा चोरपाटा खोलाले आमा र छोरा दुवै जनालाई बगाएको थियो ।
३० मिटर तलसम्म बगेर आमा बच्न सफल हुनुभएको थियो । ओमकारको शव ४ सय मिटर तल भेटिएको छत्रेश्वरी गाउँपालिका-४ का वडाअध्यक्ष नेवबहादुर खड्काले बताउनुभयो ।
दिलसराको स्थानीय अस्पतालमा उपचार भइरहेको प्रहरीले जनाएको छ ।
