‘गाभी’सँग थप १५ लाख मात्रा खोप माग गर्दै पुनः पत्र
काठमाडौं,पुस २९ । सरकारले छिमेकी देशमा कोरोना भाइरस संक्रमण फैलिरहेको अवस्थामा अतिरिक्त मात्रा (बुस्टर डोज)का लागि थप खोपको माग गरेको छ । स्वास्थ्य तथा जनसंख्या मन्त्रालयले थप १५ लाख मात्रा बुस्टर डोज माग गर्दै बिहीवार ‘भ्याक्सिन र खोपका लागि ग्लोबल एलायन्स’ (गाभी)लाई औपचारिक रूपमा पुनः पत्र पठाएको छ । स्वास्थ्य सेवा विभाग, परिवार कल्याण महाशाखाको बालस्वास्थ्य तथा खोप शाखाका प्रमुख सागर दाहालले १५ लाख मात्रा खोपका लागि ‘गाभी’लाई पत्र पठाइएको जानकारी दिए । यसअघि पुस १४ गते पनि शाखाले बुस्टर डोजका लागि १५ लाख मात्रा खोप माग गरी पत्र पठाएको थियो ।
उक्त पत्रअनुसार गाभीले आगामी माघ १९ गते १५ लाख मात्रा खोप उपलब्ध गराउने जानकारी गराइसकेको छ । ‘बुस्टर डोजका लागि १५ लाख मात्रा खोपले मात्र नपुगेपछि थप १५ लाख मात्रा खोपका लागि हामीले गाभीसँग माग राखी पत्र पठाएका छौं,’ उनले भने, ‘गाभीले खोपबारे चाँडै नै जानकारी गराउनेछ ।’ गाभीले कोभ्याक्स सुविधाअन्तर्गत नेपाललाई बुस्टर डोजका लागि फाइजरको ‘बाइभ्यालेन्ट’ खोप पठाउन थालेको हो । बुस्टर डोजका लागि मात्र ३० लाख मात्रा खोप आउनेछ । छिमेकी मुलुक भारत र चीनमा बीएफ सात नामक प्रजातिको नयाँ भेरियन्ट फैलिन थालेपछि मन्त्रालयले बुस्टर खोप लगाउन छुटेका सबैलाई खोप लगाउन आग्रह गरेको छ ।
मन्त्रालयले संक्रमणबाट जोगिन अनिवार्य मास्क प्रयोग गर्न, भौतिक दूरी कायम गर्न, साबुनपानीले हात धुन वा सेनिटाइजर नियमित प्रयोग गर्न समेत आग्रह गरेको छ ।
