एमाले सिध्याउन पार्टीभित्रैबाट घेराबन्दी भएको थियो : अध्यक्ष ओली
धनगढी,असोज २१ । पूर्व प्रधानमन्त्री एवम् नेकपा (एमाले) का अध्यक्ष केपी शर्मा ओलीले गत निर्वाचनमा एमालेलाई सिद्ध्याउन पार्टीभित्रैबाट प्रयत्न भएको बताएका छन् । नेकपा (एमाले) सुदूरपश्चिम प्रदेश कमिटीको प्रथम अधिवेशनको आइतबार धनगढीमा उद्घाटन गर्दै उनले सो कुरा बताएका हुन् ।
उनले भने, “पार्टीभित्रको तत्त्वलाई परिचालन गरेर हाम्रो पार्टीलाई नै सिद्ध्याउने प्रयत्न भएको थियो । तर पनि हामीले पार्टीलाई जोगाएर यस ठाउँसम्म ल्याएका छौँ ।” पार्टी अध्यक्ष म लगायत पार्टीको शीर्ष नेतृत्वलाई साधारण सदस्यबाट समेत हटाउने काम भएको उनले स्मरण गरे । पार्टी भित्रैबाट भएको डरलाग्दो घेराबन्दीका कारण एमालेले बहुमत प्राप्त गर्न नसकेको उनको भनाइ छ ।
सुदूरपश्चिम प्रदेशमा प्रतिनिधि सभातर्फ दुई सिटमात्रै जितेको भन्दै ओलीले समृद्ध नेपाल, सुखी नेपाली बनाउन एमाले मिसन ८४ मा लागेको बताए । उनले २०८४ मा आफ्नो पार्टीले बहुमत प्राप्त गर्ने दाबी गरे । “एमालेको बहुमतको सरकार बन्छ” उनले भने ।
यसैगरी, अहिले मुलुकमा देश बदल्ने, जनता सम्झिने सरकार नरहेको उनको टिप्पणी छ । वर्तमान सरकारले विकास, सुशासन र जनताको पक्षमा काम गर्न नसकेको उनले टिप्पणी गरे ।
त्यस्तै, एमाले महासचिव शङ्कर पोखरेलले मुलुकमा राजनीतिक स्थिरता ल्याउने सामर्थ्य आफ्नो पार्टीमा मात्र रहेको बताए । उनले पार्टीलाई अझ बलियो बनाउनेतर्फ लाग्न सबै नेता, कार्यकर्ताहरूलाई आग्रह गरे । “आफ्नो आकाङ्क्षा पार्टीको हितमा राख्न सकिँदैन भने पार्टी बलियो हुँदैन” उनले भने ।
