लागू औषधसहित एकजना पक्राउ
झापा,चैत ९ । झापाको कनकाई नगरपालिका ४ कनकाई पुलबाट प्रतिबन्धित लागू औषधसहित एकजनालाई प्रहरिले पक्राउ गरेको छ । बिहीबार राति ८ः४५ बजेको समयमा पूर्वपश्चिम राजमार्गअन्तर्गत कनकाई ४ कनकाई पुलछेउबाट प्रतिबन्धित लागू औषधसहित दमक १ बस्ने २७ वर्षीय छङ राईलाई पक्राउ गरेको हो ।
बिर्तामोडबाट दमकतर्फ जाँदै गरेको मे. १० प ३२७६ नम्बरको मोटरसाइकललाई ट्राफिक प्रहरी कार्यालय झापाका प्रहरी निरीक्षक नवराज न्यौपाने र इलाका प्रहरी कार्यलय सुरुङगाका वरिष्ठ प्रहरी नायब निरीक्षक प्रबिण कुमार भट्टराईको कमाण्डमा खटिएको संयुक्त प्रहरी टोलीले शङ्का लागि चेक जाँच गर्ने क्रममा लागू औषध फेला परेको थियो ।
राईले पछाडि बोकेको कालो झोलाभित्र कालो प्लास्टिकमा एबोट ४९ एम्पुल, डाइजापाम ४९ एम्पुल, नाम नलुखेको लागू औषध ४९ एम्पुल, लुपिजेसिक २ एमएल लेखेको स्टिकर ७० थान, रेडमी मोबाइल थान एक र नगद ६ हजार दुई सय फेला परेको प्रहरीले जनाएको छ ।
प्रहरीले उनलाई मोटरसाइकलसहित नियन्त्रणमा लिई इलाका प्रहरी कार्यालय अनारमनीमा राखेर अनुसन्धान गरिरहेको जिल्ला प्रहरी कार्यालय झापाले जनाएको छ ।
