संसद् मर्यादित र सक्रिय हुनुपर्छ : रवि लामिछाने

काठमाडौँ, वैशाख ३ गते । रवि लामिछाने (Rabi Lamichhane) ले संसद्‌लाई मर्यादित र सक्रिय ढङ्गले अगाडि बढाउनुपर्ने बताउनुभएको छ।

संसदीय समितिको बैठकपछि सञ्चारकर्मीहरूसँग कुरा गर्दै Rastriya Swatantra Party (रास्वपा) का सभापति लामिछानेले संसद्‌को प्रमुख जिम्मेवारी आवश्यक कानुन निर्माण र परिमार्जन गर्नु रहेको उल्लेख गर्नुभयो। उहाँले विवेकपूर्ण ढङ्गले सदन अगाडि बढ्ने विश्वास व्यक्त गर्दै सभामुखको भूमिका पनि सकारात्मक रहने अपेक्षा राख्नुभयो।

उहाँका अनुसार यस वर्ष समाजमा व्याप्त विसङ्गति र बेथितिहरू अन्त्य गर्ने महत्वपूर्ण अवसर रहेको छ। प्रधानमन्त्री र मन्त्रीहरूको सम्पत्ति अस्वाभाविक भएको भन्ने चर्चाका सन्दर्भमा लामिछानेले सार्वजनिक पदमा रहेका सबै व्यक्तिहरू छानबिनको दायरामा पर्ने स्पष्ट पार्नुभयो।

लामिछानेले छानबिन आयोग गठन भइसकेको र त्यसको कार्यक्षेत्र (टीओआर) भित्र प्रधानमन्त्रीदेखि मन्त्रीहरूसम्म सबै समेटिने बताउनुभयो। साथै, भ्रष्टाचार र बेथिति अन्त्यका लागि राज्यका निकायहरू गम्भीर हुनुपर्नेमा उहाँले जोड दिनुभयो।