युएईविरुद्ध टी–२० शृङ्खलाका लागि नेपालको टोली घोषणा, ऐरी कप्तान
काठमाडौं, बैशाख ४ — नेपाल र संयुक्त अरब इमिरेट्स (युएई) बीच हुने आगामी टी–२० अन्तर्राष्ट्रिय क्रिकेट शृङ्खलाका लागि नेपाली राष्ट्रिय टोली घोषणा गरिएको छ।
नेपाल क्रिकेट सङ्घ (क्यान) ले शुक्रबार सार्वजनिक गरेको टोलीको नेतृत्व अलराउन्डर दीपेन्द्रसिंह ऐरीले गर्नुहुने भएको छ। नियमित कप्तान रोहितकुमार पौडेललाई कार्यबोझ व्यवस्थापनका लागि आराम दिइएकाले यस शृङ्खलामा कप्तानी जिम्मेवारी ऐरीलाई सुम्पिएको क्यानले जनाएको छ।
रोहितकै कप्तानीमा नेपालले हालै दुईपटक टी–२० विश्वकपमा स्थान सुरक्षित गरिसकेको छ। घोषित टोलीमा कप्तान ऐरीसहित सन्दीप लामिछाने, कुशल भुर्तेल, कुशल मल्ल, सन्दीप जोरा, आरिफ शेख, बसिर अहमद, गुल्सन झा, लोकेश बम, नन्दन यादव, सन्तोष यादव, अर्जुन साउद, हेमन्त धामी, शाहब आलम र शेर मल्ल रहेका छन्।
यस्तै, वैकल्पिक खेलाडीका रूपमा प्रतिश जिसी, नारायण जोशी र राशिद खानलाई समावेश गरिएको क्यानले जनाएको छ।