रास्वपा महाधिवेशन तयारीमा: वैशाख १५ देखि देशभर जिल्ला अधिवेशन सुरु हुने
काठमाडौँ, वैशाख ७ — राष्ट्रिय स्वतन्त्र पार्टी (रास्वपा) ले पहिलो राष्ट्रिय महाधिवेशनको तयारीलाई तीव्र बनाएको छ। पार्टी स्थापना भएको तीन वर्षमै प्रतिनिधि सभामा उल्लेखनीय सफलता हासिल गरेको रास्वपाले संगठन विस्तार र सुदृढीकरणमा ध्यान केन्द्रित गरेको हो।
पार्टी सभापति रवि लामिछाने को अध्यक्षतामा आइतबार केन्द्रीय कार्यालयमा बसेको केन्द्रीय सचिवालय बैठकले यही वैशाख १५ गतेदेखि देशभर जिल्ला अधिवेशन सुरु गर्ने निर्णय गरेको छ। बैठकमा केन्द्रीय समिति सदस्यहरूको समेत उपस्थिति रहेको थियो।
पार्टीका प्रवक्ता मनीष झा का अनुसार सभापति लामिछानेको निर्देशनमा सोमबार बस्ने केन्द्रीय समिति बैठकमा सबै सदस्यलाई अनिवार्य उपस्थितिका लागि सूचना जारी गरिएको छ। बैठकले पार्टीको प्रवास विभाग प्रमुखमा केन्द्रीय सचिवालय सदस्य तथा सांसद दीपक बोहोरा लाई नियुक्त गर्ने निर्णय गरेको छ। यसअघि उक्त विभागको नेतृत्व सम्हाल्नुभएका डोलप्रसाद अर्याल (डिपी अर्याल) प्रतिनिधि सभाको सभामुख बनेपछि नयाँ जिम्मेवारी तोकिएको प्रवक्ता झाले जानकारी दिनुभयो।
सचिवालय बैठकले तय गरेको कार्यसूचीअनुसार सोमबार बस्ने केन्द्रीय समिति बैठकले जिल्ला अधिवेशन कार्यविधि निर्माण, बैङ्क खाता सञ्चालन, केन्द्रीय आयोग गठन लगायतका विषयमा निर्णय गर्नेछ।साथै, सल्लाहकार परिषद्, सङ्घीय नेतृत्व मञ्च तथा विभिन्न विभागहरूको मनोनयन, महाधिवेशन कार्यविधि मसौदा समिति गठनलगायत विषयमा पनि छलफल हुने जनाइएको छ।
रास्वपाले महाधिवेशनमार्फत संगठनलाई थप व्यवस्थित र प्रभावकारी बनाउने लक्ष्य लिएको छ।