निर्वाचनको असफलता समीक्षा गर्दै एमालेलाई पुनः उचाइमा पुर्याउने ओलीको प्रतिबद्धता
काठमाडौँ, बैशाख ९ — नेकपा एमालेका अध्यक्ष केपी शर्मा ओलीले हालैको निर्वाचनमा व्यहोर्नुपरेको असफलताको गम्भीर समीक्षा गर्दै पार्टीलाई पुनः सशक्त बनाउने बताएका छन्।
कम्युनिष्ट पार्टी स्थापना दिवसको अवसरमा ललितपुरको च्यासलमा आयोजित कार्यक्रममा पठाएको सन्देशमा उनले पार्टीभित्र देखिएका चुनौतीहरूलाई सामना गर्दै अघि बढ्न कार्यकर्ताहरूलाई आह्वान गरेका हुन्। अध्यक्ष ओलीको सन्देश कार्यवाहक अध्यक्ष रामबहादुर थापाले वाचन गरेका थिए।
सन्देशमा ओलीले नेकपा एमालेले इतिहासदेखि वर्तमानसम्म महत्वपूर्ण भूमिका निर्वाह गर्दै आएको उल्लेख गर्दै पछिल्लो निर्वाचन परिणाम अपेक्षाअनुसार नआएको स्वीकार गरे। “असामान्य परिस्थितिमा भएको निर्वाचनको परिणाम प्रतिकूल रहन गयो,” उनले भने, “तर यस्ता चुनौतीहरू सामना गर्दै नै पार्टी यहाँसम्म आइपुगेको हो।”
उनले असफलताको कारणबारे समग्र पार्टीभित्र गम्भीर समीक्षा गर्नुपर्ने आवश्यकता औँल्याउँदै पुनः आन्दोलनलाई सफलता तर्फ लैजान एकजुट हुन आग्रह गरे।
लामो समय अस्पतालमा उपचारपछि हाल घरमै आराम गरिरहेका अध्यक्ष ओलीले विशेष सन्देशमार्फत पार्टीपंक्तिलाई निराश नहुन र दृढतापूर्वक अघि बढ्न निर्देशन दिएका छन्।