खोलामा बोराभित्र भेटिएको युवतीको शव रहस्य: हत्याको कारण यस्तो
झापा,जेठ २३ । झापाको दमकमा रतुवा खोलाको पुलमुनि सेतो बोराभित्र पोको पारिएको अवस्थामा एक युवतीको शव फेला परेको घटनाले स्थानीय समुदायलाई स्तब्ध बनाएको थियो। शव कसको हो, कसरी त्यहाँ पुग्यो र घटनाको पछाडि को थियो भन्ने प्रश्नले पाँच दिनसम्म प्रहरीलाई गहन अनुसन्धानमा व्यस्त बनायो। अन्ततः प्रहरीले घटनामा संलग्न रहेको आरोपमा एक व्यक्तिलाई पक्राउ गर्दै घटनाको प्रारम्भिक रहस्य उजागर गरेको छ।
गत जेठ १६ गते दमक नगरपालिका–१० स्थित रतुवा खोलाको पुलमुनि फेला परेको शवको सनाखत मृतकका पिता नारायण तिवारीले २१ वर्षीया रोमा (रमा) तिवारीका रूपमा गरेका थिए। शव भेटिएसँगै प्रहरीले घटनालाई संवेदनशील रूपमा लिँदै अनुसन्धान थालेको थियो।
कोशी प्रदेश प्रहरी कार्यालय विराटनगर, प्रदेश प्रहरी कार्यालय धरान र इलाका प्रहरी कार्यालय दमकको संयुक्त टोलीले घटनास्थलको सूक्ष्म अध्ययन, प्राविधिक विश्लेषण तथा आसपासका सीसीटीभी फुटेजको अनुसन्धानलाई तीव्र बनायो। अनुसन्धानका क्रममा प्राप्त प्रमाण र तथ्यका आधारमा प्रहरीले घटनामा संलग्न रहेको आशंकामा भारतको बिहार राज्य, अररिया जिल्लाका स्थायी बासिन्दा तथा हाल दमक–५ मा बस्दै आएका ३४ वर्षीय राकेश कुमार पण्डितलाई पहिचान गरेको जनाएको छ।
प्रहरीका अनुसार टाइल्स मिस्त्रीको काम गर्दै आएका पण्डितलाई जेठ २१ गते राति करिब ११ बजे दमक–५ स्थित डेराबाट पक्राउ गरिएको हो। प्रहरी नायव उपरीक्षक हरि बहादुर बस्नेतको नेतृत्वमा खटिएको टोलीले उनलाई नियन्त्रणमा लिएर थप अनुसन्धानका लागि इलाका प्रहरी कार्यालय दमकमा ल्याएको थियो।
प्रारम्भिक बयानका क्रममा आरोपितले मृतकसँग पैसासम्बन्धी विवाद भएको र सोही क्रममा झगडा हुँदा हत्या गरेको स्वीकार गरेको प्रहरीले जनाएको छ। घटनाको प्रकृति र अनुसन्धानबाट प्राप्त अन्य तथ्यका आधारमा प्रहरीले ज्यान सम्बन्धी कसूरसँगै जबरजस्ती करणीसम्बन्धी कसूरमा पनि मुद्दा दर्ता गरेको छ।
झापा जिल्ला अदालतबाट पाँच दिनको म्याद थप अनुमति लिएर इलाका प्रहरी कार्यालय दमकले घटनाबारे थप अनुसन्धान अघि बढाइरहेको जनाएको छ। प्रहरीले घटनासँग सम्बन्धित विभिन्न दशी प्रमाणहरू समेत बरामद गरेको र ती प्रमाणको परीक्षण तथा विश्लेषण भइरहेको जनाएको छ।
शान्त देखिने दमकलाई स्तब्ध बनाएको यो घटनाले महिलाको सुरक्षा, सामाजिक सम्बन्ध र अपराध अनुसन्धानमा आधुनिक प्रविधिको प्रयोगबारे फेरि एकपटक बहस सुरु गराएको छ। प्रहरीले घटनाको सम्पूर्ण सत्यतथ्य अनुसन्धानपछि सार्वजनिक गर्ने जनाएको छ।