घरेलु मैदानमा मेक्सिकोको दमदार सुरुआत, उद्घाटन खेलमै दक्षिण अफ्रिका पराजित
मेक्सिको, जेठ २९ । फिफा विश्व कप २०२६ (FIFA World Cup 2026) को उद्घाटन खेलमा आयोजक मेक्सिको (Mexico) ले उत्कृष्ट प्रदर्शन गर्दै दक्षिण अफ्रिका (South Africa) माथि २–० को जित निकालेको छ। मेक्सिको सिटी रंगशालामा बिहीबार राति सम्पन्न समूह ‘ए’ को खेलमा जुलियन क्विन्योनेस र राउल हिमेनेजले एक–एक गोल गर्दै टोलीलाई महत्वपूर्ण तीन अंक दिलाए।
घरेलु समर्थकको उत्साहपूर्ण समर्थनबीच मैदान उत्रिएको मेक्सिकोले खेलको सुरुआतदेखि नै दबाब कायम राख्यो। खेलको सुरुआती मिनेटमै इस्राएल रेयेसको क्रसमा राउल हिमेनेजले गरेको प्रहार दक्षिण अफ्रिकाका कप्तान तथा गोलरक्षक रोनवेन विलियम्सले शानदार बचाउ गरेका थिए।
तर नवौं मिनेटमा मेक्सिकोले अग्रता लिन सफल भयो। एरिक लिराले विपक्षी खेलाडी स्फेफेलो सिथोलेबाट बल खोसेपछि जुलियन क्विन्योनेसले पेनाल्टी क्षेत्रभित्रबाट गरेको प्रहार गोलरक्षक विलियम्सको खुट्टामुनिबाट जालीमा पुगेको थियो।
पहिलो हाफमा दक्षिण अफ्रिकाले थप गोल खानबाट जोगियो।विलियम्सले हिमेनेजको हेडर रोके भने क्विन्योनेसको अर्को प्रयास पोस्टमा लागेर फर्किएको थियो। दोस्रो हाफमा दक्षिण अफ्रिकाको अवस्था झन् कठिन बन्यो। ६०औँ मिनेटमा गोलतर्फ अघि बढिरहेका हिमेनेजलाई सिथोलेले पेनाल्टी क्षेत्रबाहिर लडाएपछि रेफ्रीले उनलाई रातो कार्ड देखाउँदै मैदानबाट बाहिर पठाए।
एक खेलाडीले कम भएको दक्षिण अफ्रिकामाथि मेक्सिकोले थप दबाब सिर्जना गर्यो। ६७औँ मिनेटमा क्विन्योनेस र हिमेनेजबीचको आकर्षक पास आदानप्रदानपछि रोबर्टो अल्भाराडोले दिएको क्रसलाई हिमेनेजले हेडमार्फत गोलमा परिणत गर्दै टोलीको अग्रता २–० पुर्याए।
खेलको अन्त्यतिर दुवै टोलीले थप एक–एक खेलाडी गुमाए। दक्षिण अफ्रिकाका वैकल्पिक खेलाडी थेम्बा ज्वाने र मेक्सिकोका केन्द्रीय रक्षक सेजार मोन्टेसले रातो कार्ड पाएपछि मैदान छाड्नुपरेको थियो।यस जितसँगै मेक्सिकोले विश्वकप उद्घाटन खेलमा आफ्नो प्रभावशाली इतिहासलाई निरन्तरता दिएको छ। टोलीले लगातार आठौँ उद्घाटन खेलमा हार बेहोरेको छैन। यस अवधिमा उसले ६ जित र २ बराबरी नतिजा निकालेको छ। सन् २०१० को विश्वकप उद्घाटन खेलमा पनि मेक्सिको र दक्षिण अफ्रिकाले १–१ को बराबरी खेलेका थिए।