साकाको ह्याट्रिकमा फ्रान्सलाई हराउँदै इङ्ग्ल्यान्ड विश्वकप २०२६ मा तेस्रो
काठमाडौं,साउन ३– बुकायो साकाको उत्कृष्ट ह्याट्रिक प्रेरणामा इङ्ग्ल्यान्डले फिफा विश्वकप २०२६ को तेस्रो स्थानका लागि भएको खेलमा फ्रान्सलाई ६–४ ले पराजित गरेको छ।
अमेरिकाको मियामी स्टेडियममा शनिबार सम्पन्न रोमाञ्चक प्रतिस्पर्धामा इङ्ग्ल्यान्डले पहिलो हाफमै ४–० को प्रभावशाली अग्रता बनाएको थियो। खेलको तेस्रो मिनेटमा डेक्लान राइसले बक्स बाहिरबाट आकर्षक प्रहार गर्दै खाता खोलेका थिए।
त्यसपछि एज्री कोन्साले अर्को गोल थपे भने बुकायो साकाले पहिलो हाफमै दुई गोल गर्दै इङ्ग्ल्यान्डलाई सहज अवस्थामा पुर्याए।
दोस्रो हाफमा फ्रान्सले शानदार पुनरागमनको प्रयास गर्यो। माइकल ओलिसेको पासमा किलियन एम्बाप्पेले ४८औँ मिनेटमा गोल फर्काएपछि ५४औँ मिनेटमा ब्राड्ली बारकोलाले अर्को गोल गर्दै अन्तर घटाए। ६६औँ मिनेटमा एम्बाप्पेले व्यक्तिगत दोस्रो गोल गर्दै फ्रान्सलाई खेलमा फर्काउने संकेत दिएका थिए।
तर ८७औँ मिनेटमा मालो गुस्टोले जेड स्पेन्सलाई फाउल गरेपछि इङ्ग्ल्यान्डले पेनाल्टी पायो। उक्त अवसरलाई सदुपयोग गर्दै साकाले आफ्नो ह्याट्रिक पूरा गरे। इन्जुरी समयमा उस्मान डेम्बेलेले फ्रान्सका लागि चौथो गोल गरे पनि त्यसको दुई मिनेटपछि जुड बेलिङ्घमले उत्कृष्ट व्यक्तिगत प्रदर्शनसहित गोल गर्दै इङ्ग्ल्यान्डको ६–४ को जित पक्का गरे।
इङ्ग्ल्यान्डका लागि डेक्लान राइस, एज्री कोन्सा, बुकायो साका (तीन गोल) र जुड बेलिङ्घमले गोल गरे। फ्रान्सका तर्फबाट किलियन एम्बाप्पेले दुई तथा ब्राड्ली बारकोला र उस्मान डेम्बेलेले एक–एक गोल गरे।
यस जितसँगै इङ्ग्ल्यान्डले सन् १९६६ मा घरेलु मैदानमा विश्वकप उपाधि जितेपछि पहिलो पटक विश्वकपमा तेस्रो स्थान हासिल गरेको छ। साथै, यो खेल फ्रान्सका मुख्य प्रशिक्षक दिदिएर देशाँको कार्यकालको अन्तिम खेलका रूपमा पनि दर्ज भएको छ।