मेस्सीको जादु कि स्पेनको सामूहिक शक्ति ? विश्वकप फाइनलमा दुई फुटबल दर्शनको महामुकाबला
काठमाडौँ,साउन ३ । फिफा विश्वकप २०२६ को बहुप्रतीक्षित फाइनलअघि फिफाको प्राविधिक अध्ययन समूहले स्पेन र अर्जेन्टिनाको खेलशैलीबारे विस्तृत विश्लेषण सार्वजनिक गर्दै उपाधि भिडन्तमा स्पेनको अनुशासित काउन्टर–प्रेसिङ र अर्जेन्टिनाका कप्तान लियोनल मेस्सीको सिर्जनात्मक क्षमताबीचको प्रतिस्पर्धा निर्णायक बन्न सक्ने जनाएको छ।
साविक विजेता अर्जेन्टिना र युरोपियन च्याम्पियन स्पेनबीचको फाइनल खेल राति १२:४५ बजे सुरु हुनेछ। दुवै टोली उत्कृष्ट लयमा रहेकाले विश्व फुटबलकै सबैभन्दा रोमाञ्चक फाइनलमध्ये एक हुने अपेक्षा गरिएको छ।
ब्राजिलका विश्वकप विजेता पूर्वमिडफिल्डर तथा प्राविधिक अध्ययन समूहका सदस्य गिल्बर्टो सिल्भाले स्पेनको सबैभन्दा ठूलो बल धैर्यपूर्ण पासिङ, बलमाथिको नियन्त्रण र बल गुमाएलगत्तै देखाउने तीव्र दबाब भएको बताए। उनका अनुसार स्पेनले विपक्षीको रक्षापंक्ति फैलाएर बीचको खाली स्थान उपयोग गर्ने शैली अपनाउने गरेको छ।
सिल्भाले स्पेनको काउन्टर–प्रेसिङ प्रतियोगिताकै उत्कृष्टमध्ये एक रहेको उल्लेख गर्दै बल गुमाउनेबित्तिकै धेरै खेलाडीले एकसाथ दबाब सिर्जना गर्ने भएकाले विपक्षीलाई सहज रूपमा आक्रमण अघि बढाउन कठिन हुने बताए। स्पेनले प्रतियोगिताका सात खेलमा केवल एक गोल मात्र बेहोरेको तथ्यले पनि उसको रक्षात्मक मजबुती पुष्टि गरेको उनले बताए।
यता अमेरिकी पूर्वखेलाडी तथा प्राविधिक अध्ययन समूहकी सदस्य टोबिन हिथले अर्जेन्टिनाको सम्पूर्ण आक्रमण कप्तान लियोनल मेस्सीलाई केन्द्रमा राखेर निर्माण गरिएको बताइन्। उनका अनुसार अर्जेन्टिनाले मैदानका विभिन्न क्षेत्रमा खेलाडीको संख्या बढाएर विपक्षीको ध्यान एकातिर केन्द्रित गराउने र त्यसपछि मेस्सीलाई बल उपलब्ध गराउने रणनीति अपनाउने गरेको छ।
हिथका अनुसार मेस्सीले धेरै रक्षकलाई आफूतिर तान्दा अन्य खेलाडीका लागि खाली स्थान सिर्जना हुन्छ। अवसर निर्माण र गोल गर्ने जिम्मेवारीमा अर्जेन्टिना अझै पनि ठूलो हदसम्म मेस्सीमै निर्भर रहेको उनको विश्लेषण छ।
उनले अर्जेन्टिनाले रक्षात्मक अवस्थामा मेस्सीलाई धेरै जिम्मेवारी नदिई अग्रपंक्तिमै राख्ने रणनीति अपनाउने बताइन्। यसले बल पुनः प्राप्त गरेलगत्तै तीव्र प्रतिआक्रमण गर्न सहज हुने र मेस्सीले आफ्नो सिर्जनात्मक क्षमतामार्फत खेलको गति नियन्त्रण गर्न सक्ने उनको भनाइ छ।
फिफाको प्राविधिक अध्ययन समूहका अनुसार फाइनलमा दुई फरक फुटबल दर्शन आमनेसामने हुनेछन्। एकातर्फ स्पेनको धैर्यपूर्ण पासिङ, बलमाथिको नियन्त्रण र अनुशासित काउन्टर–प्रेसिङ रहनेछ भने अर्कोतर्फ अर्जेन्टिनाको तीव्र प्रतिआक्रमण, संख्यात्मक रणनीति र मेस्सीको असाधारण सिर्जनात्मक क्षमता हुनेछ।
यही कारण विश्वकप २०२६ को उपाधि भिडन्तलाई स्पेनको सामूहिक अनुशासन र मेस्सीको व्यक्तिगत प्रतिभाबीचको निर्णायक संघर्षका रूपमा हेरिएको छ।