चीन–नेपाल सीमा क्षेत्रमा बाढीको जोखिम बढेपछि तिब्बतमा उद्धार अभियान रोकियो
काठमाडौं,भदौ १२ । चीन–नेपाल सीमा क्षेत्रमा बाढीको जोखिम बढेपछि चीनले तिब्बतमा जारी खोज तथा उद्धार अभियान अस्थायी रूपमा रोकेको छ। पहिरो गएको दुई दिनपछि पनि सयौँ व्यक्ति बेपत्ता रहेका बेला उद्धार टोलीलाई सुरक्षित स्थानमा फर्काइएको चिनियाँ सरकारी सञ्चारमाध्यमले जनाएको छ।
सरकारी प्रसारक सिसिटिभीका अनुसार पहिरोपछि बनेको विशाल तालको पानी उद्धार टोली परिचालित क्षेत्रतर्फ फैलिन थालेपछि तत्काल उद्धार कार्य रोक्न र थप निर्देशन पर्खन भनिएको हो।प्रभावित क्षेत्रमा प्रवेश गरिसकेका आपत्कालीन टोलीलाई समेत करिब एक किलोमिटर पछाडि हटाइएको छ।
बुधबार तिब्बतको सीमावर्ती केन्द्र ग्यिरोङमा माटो र भग्नावशेष खसेपछि पानी थुनिएर विशाल ताल बनेको थियो। लगातार वर्षाका कारण आगामी तीन दिनमा तालको जलस्तर थप बढ्न सक्ने अनुमान गरिएको छ।
जलस्तर बढ्दा तालमा दरार पर्न सक्ने र त्यसबाट तल्लो क्षेत्रमा बाढी पस्दा ग्यिरोङ बन्दरगाहलगायतका क्षेत्रमा थप क्षति हुन सक्ने जोखिम रहेको चिनियाँ समाचार संस्था सिन्ह्वाले जनाएको छ।
शुक्रबारसम्म विपद् प्रभावित क्षेत्रबाट ४९९ चिनियाँ र ५५५ विदेशी नागरिकलाई सुरक्षित स्थानमा सारिएको छ। उद्धारकर्मीले ड्रोनबाट तयार गरिएको त्रिआयामिक नमुना, तापीय तस्बिर प्रविधि तथा प्रत्यक्ष खोजीमार्फत बेपत्ताको खोजी जारी राखेका छन्।
आपत्कालीन इन्जिनियरिङ टोलीले तालको अवस्था नजिकबाट निगरानी गरिरहेको छ। बाढीको जोखिम कम भएपछि खोज तथा उद्धार अभियान पुनः सञ्चालन गरिने अपेक्षा गरिएको छ।