आज देशभर बदली, छ प्रदेशमा भारी वर्षाको सम्भावना
काठमाडौं,भदौ २२ । देशभर आज मौसम सामान्यदेखि पूर्ण बदली रहने मौसम पूर्वानुमान महाशाखाले जनाएको छ ।
महाशाखाका अनुसार कोशी, बागमती, गण्डकी, कर्णाली, लुम्बिनी र सुदूरपश्चिम प्रदेशका केही स्थानमा मध्यमदेखि भारी वर्षाको सम्भावना छ ।
कोशी, बागमती र गण्डकीका हिमाली तथा पहाडी भूभाग, कर्णालीको पहाडी क्षेत्र तथा लुम्बिनी र सुदूरपश्चिमका पहाडी र तराई क्षेत्रमा एक–दुई स्थानमा भारी वर्षा हुनसक्ने पूर्वानुमान गरिएको छ ।
देशका पहाडी भूभागका धेरै स्थानमा मेघगर्जन र चट्याङसहित वर्षाको सम्भावना रहेको छ । हिमाली क्षेत्रमा वर्षासँगै हिमपात हुनसक्ने महाशाखाले जनाएको छ ।
विशेषगरी लुम्बिनी र सुदूरपश्चिमका तराई क्षेत्रमा धेरै स्थानमा तथा बागमती र गण्डकीका तराई क्षेत्रमा केही स्थानमा मेघगर्जनसहित मध्यम वर्षा हुनसक्नेछ ।
राति पनि देशभर सामान्यतया बदली रहनेछ । कोशी प्रदेशका पहाडी तथा तराई क्षेत्रमा एक–दुई स्थानमा भारी वर्षाको सम्भावना रहेको छ ।
मौसम विज्ञानअनुसार २४ घण्टामा ५० देखि १०० मिलिमिटरसम्म वर्षा भएमा त्यसलाई भारी वर्षा मानिन्छ । १०० देखि २०० मिलिमिटरसम्मलाई धेरै भारी र २०० मिलिमिटरभन्दा बढी वर्षालाई अति भारी वर्षा भनिन्छ ।