तीजको दर खर्च कटाएर बाढीपीडितलाई सहयोग
काभ्रेपलान्चोक,भदौ २८ । पाँचखाल नगरपालिकाका महिला स्वास्थ्य स्वयंसेविकाले तीजको दर खाने खर्च कटाएर भोटेकोशी बाढीपीडितका लागि सहयोग गरेका छन् । पाँचखाल नगरपालिका–३, ४, ५ र ६ का महिला स्वास्थ्य स्वयंसेविकाले दर खाने कार्यक्रमका लागि छुट्याइएको रु १५ हजार ५४५ प्रधानमन्त्री दैवी प्रकोप उद्धार कोषमा जम्मा गरेका हुन् ।
बाढीपीडितलाई केही राहत पुगोस् भन्ने उद्देश्यले महिला स्वास्थ्य स्वयंसेविका ‘दिदीबहिनी समूह’ले दर खाने कार्यक्रमबाट रकम छुट्याएर कोषमा जम्मा गरेको समूहकी सदस्य सरस्वती भेटवालले बताउनुभयो । उहाँका अनुसार चाडपर्वको खर्चलाई पीडितको सहयोगमा रूपान्तरण गर्ने उद्देश्यले स्वयंसेविकाले उक्त निर्णय गरेका हुन् ।
यसैगरी, नमोबुद्ध नगरपालिकाका महिलाले यस वर्ष तीज विशेष कार्यक्रम नगरी बाढीपीडितका लागि रु ९१ हजार ३४५ सहयोग गरेका छन् । नगर महिला, बालबालिका तथा समाज कल्याण उपशाखाको नेतृत्वमा महिलाले गत साता उक्त रकम प्रधानमन्त्री दैवी प्रकोप उद्धार कोषमा जम्मा गरेका हुन् ।
नमोबुद्ध नगरको महिला सञ्जालले तीजका लागि हुने खर्च कटाएर बाढी प्रभावित नागरिकको उद्धार, राहत तथा पुनःस्थापनामा सहयोग गर्ने निर्णय गरेपछि रकम कोषमा जम्मा गरिएको हो ।
यसैबीच, भोटेकोशी बाढीमा विभिन्न काम तथा भ्रमणका सिलसिलामा रहेका काभ्रेपलान्चोकका ३७ नागरिक अझै सम्पर्कविहीन रहेको जिल्ला प्रशासन कार्यालय धुलिखेलले जनाएको छ । कार्यालयका अनुसार जिल्लाबाट बेपत्ता भएका ४७ जनामध्ये आठ जना परिवारको सम्पर्कमा आएका छन् भने दुई जनाको शव फेला परेको छ ।
भोटेकोशी नदीमा आएको भीषण बाढीबाट रसुवा, नुवाकोट र धादिङसहितका क्षेत्रमा ठूलो जनधनको क्षति भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार हालसम्म बाढीमा एक हजार ३८५ जनाको शव फेला परेको, पाँच हजार १३० जना बेपत्ता रहेको, १३ हजार ६७६ जनाको उद्धार गरिएको तथा सात हजार ६५५ जना घाइते भएका छन्।