यूएनजीएमा सहभागी हुनु इरानको कानुनी अधिकार : विदेश मन्त्रालय
तेहरान,असोज ४ । इरानले संयुक्त राष्ट्रसंघको ८१औँ महासभा (यूएनजीए) अधिवेशनमा सहभागी हुनु आफ्नो ‘कानुनी अधिकार’ भएको बताएको छ।
इरानी विदेश मन्त्रालयका प्रवक्ता इस्माइल बघाईले शनिबार राज्य सञ्चालित टेलिभिजन आईआरआईबीसँगको अन्तर्वार्तामा न्यूयोर्कमा हुने महासभा अधिवेशनमा इरानको सहभागिता कुनै देशले प्रदान गर्ने सुविधा वा अनुग्रह नभएको बताउनुभएको हो।
“न्यूयोर्कमा उपस्थित हुनु इरानी प्रतिनिधिका लागि विशेष आकर्षणको विषय होइन। तर यो महत्वपूर्ण मञ्च भएकाले हामीले यसलाई छाड्नु हुँदैन,” बघाईले भन्नुभयो। उहाँले महासभामा सहभागी हुनु इरानको कानुनी अधिकार भएको र इरान संयुक्त राष्ट्रसंघका ५० संस्थापक सदस्य राष्ट्रमध्ये एक रहेको उल्लेख गर्नुभयो।
इरानी प्रतिनिधिमण्डललाई महासभामा सहभागी हुनबाट रोक्न ‘अर्को पक्ष’ ले विभिन्न उपाय अपनाइरहेको आरोप पनि बघाईले लगाउनुभयो। त्यस्तो ‘अवरोध र नकारात्मक प्रचार’ले इरानलाई महासभामा आफ्नो धारणा राख्ने अधिकारबाट पछि हट्न बाध्य नपार्ने उहाँले बताउनुभयो।
महासभामा सहभागी भएर इरानी जनताको धारणा तथा आफ्नो देशको अडान अन्तर्राष्ट्रिय समुदायसमक्ष प्रस्तुत गर्नु इरानको दायित्व भएको उहाँको भनाइ थियो।
यसैबीच, अमेरिकी विदेश मन्त्रालयले बिहीबार इरानको ‘मुख्य प्रतिनिधिमण्डल’लाई यूएनजीएमा सहभागी हुन भिसा जारी गर्ने जनाएको छ। अमेरिकी विदेश मन्त्रालयका अनुसार संयुक्त राष्ट्रसंघको आयोजक राष्ट्रका रूपमा अमेरिकाको दायित्वअनुसार उक्त निर्णय गरिएको हो। अमेरिकी पक्षले यस वर्षको इरानी प्रतिनिधिमण्डल गत वर्षको तुलनामा सानो हुने जनाएको छ।
रासस/सिन्ह्वा