भोटेकोशी बाढी: शवको संख्या १ हजार ४३६ पुग्यो
काठमाडौं,असोज ४ । भोटेकोशी बाढीमा परी ज्यान गुमाएकामध्ये हालसम्म एक हजार ४३६ जनाको शव फेला परेको छ । नेपाल प्रहरीले आज बिहान ११ बजेसम्म बाढी प्रभावित विभिन्न जिल्लाबाट एक हजार ४३४ शव फेला परेको जनाएको छ ।
प्रहरीका अनुसार रसुवामा २२३, नुवाकोटमा २०३, धादिङमा ७२, चितवनमा ३६५, गोरखामा ७९, तनहुँमा ३८, नवलपरासी पूर्वमा २३२ र नवलपरासी पश्चिममा २२२ शव फेला परेका छन् । प्रहरीले सार्वजनिक गरेको जिल्लागत विवरणअनुसार उल्लेखित सङ्ख्या एक हजार ४३४ पुगे पनि समग्रमा फेला परेका शवको संख्या एक हजार ४३६ रहेको जनाएको छ ।
फेला परेका शवको पहिचानका लागि मृतक तथा आफन्तको डिएनए नमूना सङ्कलन गरिएको छ । प्रहरीले हालसम्म एक हजार २९२ शव व्यवस्थापन गरिएको जनाएको छ । शव पहिचानका लागि मृतकका एक हजार २८६ र आफन्तका एक हजार ९९७ गरी कुल तीन हजार २८३ डिएनए नमूना सङ्कलन गरिएको छ ।
पहिचान हुन बाँकी एक हजार ३६२ शवको विवरण प्रहरीले आफ्नो वेबसाइटमा सार्वजनिक गरेको छ । पहिचानका लागि आवश्यक प्रक्रिया अघि बढाउँदै शवको व्यवस्थापन तथा आफन्तसँग समन्वय भइरहेको प्रहरीले जनाएको छ ।
बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनलगायतका कार्यका लागि हालसम्म सात हजार ९७५ प्रहरी परिचालन गरिएको छ । बाढीपछि बेपत्ता भएका चार हजार ६५५ जनाको खोजी कार्यसमेत जारी रहेको प्रहरीले जनाएको छ ।