प्रधानमन्त्री शाह र परराष्ट्रमन्त्री खनाल महासभामा सहभागी हुन अमेरिका जाँदै
काठमाडौं,असोज ५ । परराष्ट्रमन्त्री शिशिर खनालको नेतृत्वमा नेपाली टोली संयुक्त राष्ट्रसङ्घको ८१औँ महासभामा सहभागी हुन आइतबार बेलुकी संयुक्त राज्य अमेरिकाको न्युयोर्क प्रस्थान गरेको छ।
मन्त्री खनालले महासभाको उच्चस्तरीय सत्रअन्तर्गत विभिन्न उच्चस्तरीय बैठक, साइड इभेन्ट तथा मन्त्रिस्तरीय कार्यक्रममा सहभागिता जनाउनुहुनेछ। उहाँले आफ्ना समकक्षी तथा अन्य विशिष्ट व्यक्तित्वसँग द्विपक्षीय भेटवार्तासमेत गर्नुहुने कार्यक्रम रहेको छ।
नेपाली उच्चस्तरीय प्रतिनिधिमण्डलको नेतृत्व गर्दै प्रधानमन्त्री वालेन्द्र शाह भने मंगलबार अर्थात् सेप्टेम्बर २२ मा अमेरिका प्रस्थान गर्नुहुने कार्यक्रम रहेको छ। प्रधानमन्त्री शाहले महासभाको उच्चस्तरीय सत्रलाई सेप्टेम्बर २४ मा सम्बोधन गर्नुहुनेछ।
प्रधानमन्त्री नेतृत्वको प्रतिनिधिमण्डलमा परराष्ट्रमन्त्री खनालसँगै प्रधानमन्त्रीका प्रमुख सल्लाहकार कुमार व्यञ्जनकार, परराष्ट्र सचिव अमृतबहादुर राई तथा नेपाल सरकारका अन्य वरिष्ठ अधिकारी सहभागी हुनुहुनेछ।
यसपटक संयुक्त राष्ट्रसङ्घको महासभामा सहभागी हुने नेपाली प्रतिनिधिमण्डलमा १४ जना रहनेछन्। न्युयोर्कमा रहँदा प्रधानमन्त्री शाहले संयुक्त राष्ट्रसङ्घका महासचिव एन्टोनियो गुटेरेससँग समेत भेटवार्ता गर्नुहुने कार्यक्रम रहेको छ।
प्रधानमन्त्री शाह सेप्टेम्बर २६ मा स्वदेश फर्किने कार्यक्रम रहेको छ भने परराष्ट्रमन्त्री खनाल सेप्टेम्बर २९ मा नेपाल आइपुग्नुहुनेछ।