एसियाली खेलकुदमा पूर्णलक्ष्मी ११औँ, सन्तोषी १२औँ
नागोया,असोज १३ । जापानको नागोयामा जारी २०औँ एसियाली खेलकुदअन्तर्गत एथलेटिक्सको महिला ५ हजार मिटर दौडमा नेपालका पूर्णलक्ष्मी न्यौपाने ११औँ र सन्तोषी श्रेष्ठ १२औँ स्थानमा रहेकी छन्।
नागोया सिटी मिजुहो पार्क एथलेटिक्स स्टेडियममा भएको फाइनलमा पूर्णलक्ष्मीले १७ मिनेट ०.६० सेकेन्डमा दूरी पूरा गरिन्। उनले आफ्नो व्यक्तिगत उत्कृष्ट समय १७ मिनेट २०.२० सेकेन्डमा सुधार गरेकी छन्।
सन्तोषीले १७ मिनेट ५३.१७ सेकेन्डमा दौड पूरा गरिन्। उनको व्यक्तिगत उत्कृष्ट समय १६ मिनेट ३६.६१ सेकेन्ड हो। बहराइनकी विनफ्रिड यावीले १५ मिनेट १०.१८ सेकेन्डमा दूरी पूरा गर्दै स्वर्ण पदक जितिन्। जापानकी नोजोमी तानाकाले १५ मिनेट ११.६५ सेकेन्डमा रजत तथा भारतकी पारुल चौधरीले १५ मिनेट १४.६१ सेकेन्डमा कांस्य पदक जितिन्।
यसअघि पूर्णलक्ष्मी महिला १ हजार ५ सय मिटर दौडमा अन्तिम स्थानमा रहेकी थिइन्। १३औँ दक्षिण एसियाली खेलकुदकी स्वर्ण पदक विजेता सन्तोषी महिला १० हजार मिटरमा १३ खेलाडीमध्ये ११औँ भएकी थिइन्।
नेपालका मुकेश पालले मंगलबार पुरुष ५ हजार मिटरको फाइनलमा प्रतिस्पर्धा गर्नेछन्। टेनिसमा स्वस्तिका र शिवाली पहिलो चरणमै बाहिरिए ।
महिला डबल्सतर्फ नेपाली जोडी स्वस्तिका बिष्ट र शिवाली गुरुङ पहिलो चरणबाटै बाहिरिएका छन्। हिगाशियामा पार्क टेनिस सेन्टरमा भएको खेलमा स्वस्तिका र शिवालीको जोडी जापानका मोमोको कोबोरी र अयानो शिमिजुसँग ६–०, ६–० को सोझो सेटमा पराजित भयो।
शिवाली यसअघि महिला सिंगल्स र मिश्रित डबल्सबाट बाहिरिसकेकी छन्। स्वस्तिका पनि महिला सिंगल्समा पराजित भएकी थिइन्। उनले मंगलबार निसान श्रेष्ठसँग जोडी बनाएर मिश्रित डबल्सको पहिलो चरणमा इन्डोनेसियाली जोडीसँग प्रतिस्पर्धा गर्नेछिन्।
प्रदीप खड्काले मंगलबार पुरुष सिंगल्सको दोस्रो चरणमा थाइल्यान्डका कासिदित सामरेजसँग खेल्नेछन्। पुरुष डबल्समा उनले आभिषेक बास्तोलासँग जोडी बनाएर भारतका अनिरुद्ध चन्द्रशेखर र बालाजी नारायणस्वामीको जोडीसँग प्रतिस्पर्धा गर्नेछन्।
आभिषेकले पुरुष सिंगल्सको दोस्रो चरणमा अलेक्जान्डर शेभचेन्कोसँग खेल्नेछन्।