चहलपहलले गुञ्जिने स्याफ्रुबेँसी बजार बाढीपछि खण्डहरमा परिणत
रसुवा,कात्तिक ७— कुनै समय व्यापारिक चहलपहल र पर्यटकको आवागमनले गुञ्जायमान रहने रसुवाको स्याफ्रुबेँसी बजार अहिले उजाड बगरमा परिणत भएको छ। लाङटाङ, तामाङ सम्पदा मार्ग र मानसरोवर यात्राको प्रवेशद्वारका रूपमा परिचित गोसाइँकुण्ड गाउँपालिका–५ स्थित यो बजार भदौ १० गते आएको भीषण बाढीपछि खण्डहर बनेको हो ।
गत भदौ १० गते लेन्दे खोलाबाट उर्लिएको बाढी भोटेकोशी नदीमा मिसिएपछि स्याफ्रुबेँसीको पुरानो स्वरूप क्षणभरमै बदलियो। तीव्र वेगमा आएको बाढीले बजारका घर, होटल, पसल र अन्य संरचना सोहोरेर लग्यो। वर्षौँको मेहनतले निर्माण भएका व्यवसाय, स्थानीयका आशा र भविष्यका योजनासमेत बाढीसँगै बगे।
पर्यटकीय गन्तव्यतर्फ जाने यात्रुको चहलपहल, होटलमा हुने व्यस्तता र किनमेलका लागि आउने मानिसको भीडले भरिने बजार अहिले सुनसान छ। जहाँ पहिले व्यापारिक गतिविधि चलायमान हुन्थ्यो, त्यहाँ अहिले बाढीले छाडेको विनाशको दृश्य देखिन्छ। बजारका होटल, सरकारी कार्यालय, जलविद्युत् आयोजना तथा केन्द्र, सुरक्षा निकायका कार्यालय र स्थानीय पूर्वाधारमा समेत बाढीले ठूलो क्षति पुर्याएको छ।
स्याफ्रुबेँसी केवल एउटा बजार मात्र थिएन। यो रसुवाको उत्तरी क्षेत्रको प्रमुख व्यापारिक केन्द्र हुनुका साथै लाङटाङ र तामाङ सम्पदा मार्ग हुँदै हिमाली गन्तव्य पुग्ने पर्यटकका लागि महत्त्वपूर्ण प्रवेशद्वार थियो। मानसरोवर यात्रासँग जोडिएको यस क्षेत्रले स्थानीयको जीविकोपार्जन र पर्यटन व्यवसायलाई समेत टेवा पुर्याउँदै आएको थियो। बजारको विनाशसँगै यहाँको व्यापारिक गतिविधि र पर्यटनसँग जोडिएको जनजीवन पनि प्रभावित बनेको छ।
बाढीले भौतिक संरचना मात्र बगाएन, स्थानीयका जीवनका आधारसमेत तहसनहस बनायो। ठूलो धनजनको क्षति हुनुका साथै सयौँ स्थानीय बेपत्ता र घरबारविहीन बने। आफ्नै पसिना र परिश्रमले बनाएका घर तथा व्यवसाय गुमाएका स्थानीयका लागि स्याफ्रुबेँसीको उजाड दृश्य जीवनमा आइपरेको ठूलो वियोगको प्रतीक बनेको छ।
हिजोसम्म पर्यटकको आगमन र व्यापारिक गतिविधिले भरिने स्याफ्रुबेँसी आज मौन छ। बजारको पुरानो रौनक हराएको छ, परिचित संरचना देखिँदैनन् र बाढीले छाडेको बगरले विनाशको कथा सुनाइरहेको छ।
प्रकृतिको एउटा भीषण प्रहारले स्याफ्रुबेँसीको भौतिक स्वरूप मात्र बदलेको छैन, यहाँको सामाजिक तथा आर्थिक जीवनलाई समेत गहिरो असर पारेको छ। कुनै समय अवसर, व्यापार र पर्यटनको केन्द्र बनेको यो बजार अहिले पुनःस्थापना र पुनर्निर्माणको प्रतीक्षामा छ। स्याफ्रुबेँसीलाई फेरि जीवन्त बजारका रूपमा उभ्याउनु यहाँका बासिन्दाको भविष्य र रसुवाको पर्यटन विकाससँग जोडिएको चुनौती बनेको छ।