दिउँसो चर्को घाम, राति शीतको सास्ती : टेन्टमा बाढीपीडितको कष्टकर बास
नुवाकोट,कात्तिक ९ । भोटेकोसी बाढीले घरबारबाट विस्थापित बनाएका परिवारका लागि सुरक्षित बासको प्रतीक्षा अझै कठिन बनिरहेको छ। नुवाकोटको विदुर नगरपालिका–५, पिपलटारस्थित अस्थायी टहरामा दिन र रात बिताइरहेका बाढीपीडितहरू प्रकृतिको दोहोरो मार सहन बाध्य छन्। दिउँसो चर्को घामले टेन्टभित्र बस्नै नसक्ने गरी गर्मी बढाउँछ भने राति अत्यधिक चिसो र शीत चुहिने समस्याले निदाउनसमेत दिँदैन।
रसुवाको उत्तरगया गाउँपालिका–५, खाल्टे र आमाछोदिङ्मो क्षेत्रबाट विस्थापित भई पिपलटारमा आश्रय लिइरहेका बाढीपीडितहरूका लागि अस्थायी टेन्ट नै अहिलेको बासस्थान बनेको छ। तर, त्यही टेन्ट उनीहरूका लागि दिनमा गर्मी र रातमा चिसो छल्ने भरपर्दो ओत बन्न सकेको छैन।
दिउँसो घाम चर्किएसँगै टेन्टभित्रको तापक्रम बढ्छ। टेन्टभित्र बस्न कठिन भएपछि उनीहरूलाई आराम गर्नसमेत समस्या हुन्छ। रात परेपछि भने अवस्था फेरिन्छ। चिसो बढ्दै जाँदा र टेन्टबाट शीत चुहिँदा सुत्न र शरीरलाई आराम दिन कठिन हुने बाढीपीडितहरूको गुनासो छ।
घरबार गुमाएर विस्थापित भएका उनीहरूका लागि अहिलेको सबैभन्दा ठूलो चुनौती सुरक्षित र सहज बासको अभाव बनेको छ। दिनभरको गर्मी र रातिको चिसो सहँदै टेन्टमा बस्नुपर्दा उनीहरूको दैनिकी कष्टकर बनेको हो ।
बाढीले घरबाट विस्थापित बनाएका परिवारले अस्थायी आश्रयमा गुजारा चलाइरहेका बेला उनीहरूलाई मौसमअनुकूल बसोबासको व्यवस्था गर्नु आवश्यक देखिन्छ। घाम र शीतबाट जोगिन सक्ने सुरक्षित आवास नहुँदासम्म बाढीपीडितको पीडा कम हुने देखिँदैन।
प्राकृतिक विपत्तिले घरबारविहीन बनाएका परिवारका लागि अस्थायी टेन्ट तत्कालको ओत त बनेको छ, तर त्यसले सुरक्षित जीवनको अनुभूति दिन सकेको छैन। उनीहरूका लागि अबको आवश्यकता केवल टेन्टमा बस्ने ठाउँ होइन, गर्मी र चिसोबाट जोगिएर निर्धक्कसँग रात बिताउन सक्ने सुरक्षित बास हो।