चक्रवात ‘अर्नब’को प्रभाव : भारी वर्षाको सम्भावना, उच्च सतर्कता अपनाउन आग्रह
काठमाडौं,कात्तिक ११ । बंगालको खाडीमा विकसित चक्रवात ‘अर्नब’को प्रभावले नेपालका विभिन्न क्षेत्रमा भारीदेखि अति भारी वर्षा हुन सक्ने भन्दै जल तथा मौसम विज्ञान विभागले उच्च सतर्कता अपनाउन आग्रह गरेको छ।
चक्रवात भारतको आन्ध्र प्रदेश र यानम आसपासको तटीय क्षेत्रबाट जमिनतर्फ प्रवेश गरिरहेको छ। कमजोर हुँदै नेपाल नजिकको भारतीय भूभागसम्म आइपुग्ने अनुमान गरिएकाले आगामी शनिबारसम्म मौसम प्रतिकूल रहन सक्ने पूर्वानुमान गरिएको छ।
कोशी, मधेस, बागमती, गण्डकी, लुम्बिनीसहित कर्णाली र सुदूरपश्चिम प्रदेशका विभिन्न स्थानमा वर्षाको सम्भावना छ। कर्णाली र सुदूरपश्चिमका केही क्षेत्रमा मेघगर्जन, चट्याङ र असिनापानीको जोखिमसमेत रहेको छ।
सम्भावित जोखिमलाई मध्यनजर गर्दै कोशी, बागमती र गण्डकी प्रदेशका हिमाली क्षेत्रमा रेड अलर्ट तथा अन्य विभिन्न क्षेत्रमा अरेन्ज अलर्ट जारी गरिएको छ।
मौसम प्रतिकूल रहने भएकाले अनावश्यक यात्रा नगर्न, मौसमसम्बन्धी सूचना नियमित रूपमा पछ्याउन तथा सम्भावित बाढी, पहिरो र चट्याङबाट जोगिन सम्बन्धित निकायले आग्रह गरेका छन्।