सुक्खायामका लागि भारतबाट १५० मेगावाट विद्युत् खरिद गर्न बोलपत्र आह्वान गर्ने तयारी



काठमाडौं,मंसिर ४ । नेपाल विद्युत् प्राधिकरणले आगामी सुक्खायाममा विद्युत् आपूर्ति व्यवस्थापन सहज बनाउन भारतबाट १५० मेगावाट विद्युत् खरिद गर्ने तयारी गरेको छ। प्राधिकरणले प्रतिस्पर्धात्मक दरमा विद्युत् खरिद गर्न अन्तर्राष्ट्रिय बोलपत्र आह्वान गर्ने तयारी गरेको हो।

प्राधिकरणले सन् २०२७ जनवरीदेखि मे महिनासम्म चौबिसै घण्टा विद्युत् आपूर्ति गर्ने गरी भारतीय विद्युत् व्यापारिक कम्पनीसँग खरिद प्रक्रिया अघि बढाउन लागेको छ।

प्राधिकरण सञ्चालक समिति सदस्य अंशुकिरण शाहीका अनुसार १५० मेगावाट विद्युत् चौबिसै घण्टा आपूर्ति हुने गरी खरिद गर्ने प्रस्ताव अघि बढाइएको छ। पछिल्ला दुई–तीन वर्षदेखि सुक्खायाममा आन्तरिक उत्पादनले माग धान्न नसक्दा भारतको विद्युत् पावर एक्सचेन्जबाट विद्युत् खरिद हुँदै आएको छ।

यस वर्ष भोटेकोशी नदीमा आएको हिमबाढीले निर्माणाधीन तथा सञ्चालनमा रहेका विद्युत् आयोजनामा क्षति पुर्‍याउँदा करिब ४३० मेगावाट विद्युत् उत्पादन प्रणालीबाट बाहिरिएको छ। यसले आगामी सुक्खायाममा विद्युत् आपूर्ति व्यवस्थापन थप चुनौतीपूर्ण हुने देखिएको छ।

प्राधिकरणको विद्युत् व्यापार विश्लेषण समितिले गत भदौ २५ गते जनवरीदेखि मे महिनासम्म १५० मेगावाट विद्युत् चौबिसै घण्टा आपूर्ति हुने गरी खरिद गर्न सिफारिस गरेको थियो। समितिले आवश्यकताअनुसार भारतीय विद्युत् बजारबाट थप खरिद गर्न र अप्रिल तथा मे महिनामा माग बढ्ने भएकाले बजारको अवस्था हेरेर थप निर्णय लिन सुझाव दिएको थियो।

आगामी सुक्खायामसम्म राष्ट्रिय विद्युत् प्रणालीमा करिब ३०० मेगावाट क्षमताका नयाँ आयोजना जोडिने अपेक्षा गरिए पनि नदीमा पानीको बहाव घट्दा ती आयोजनाबाट करिब ९० मेगावाट मात्रै विद्युत् उत्पादन हुने अनुमान छ। त्यसैले आन्तरिक उत्पादनले माग धान्न कठिन हुने प्राधिकरणको आकलन छ।

यसअघि प्राधिकरणले १५० मेगावाट विद्युत् खरिदका लागि भारतका तीन कम्पनीसँग दर प्रस्ताव माग गरेको थियो। तीमध्ये एनटीपीसी ट्रेडिङ कर्पोरेसन लिमिटेडले प्रतियुनिट ६ रुपैयाँ ९० पैसा, मनिकरण इनर्जी लिमिटेडले ८ रुपैयाँ ५० पैसा र एसजेभीएन लिमिटेडले ९ रुपैयाँ प्रस्ताव गरेका थिए।

सबैभन्दा कम दर प्रस्ताव गरेको एनटीपीसी ट्रेडिङ कर्पोरेसनलाई प्राधिकरणले असोज १६ गते आशयपत्र जारी गरेको थियो। असोज २९ गते विद्युत् खरिद सम्झौताका लागि बोलाइए पनि कम्पनीले भोलिपल्ट पत्र पठाउँदै प्रस्तावित दरमा सम्झौता गर्न नसक्ने जनाएको थियो।

कम्पनीले भूराजनीतिक अनिश्चितता, कोइला तथा अन्य इन्धनको मूल्यवृद्धि, विश्वव्यापी मौसम परिवर्तन, एल निनोको प्रभाव र भारतभित्रै विद्युत्को माग बढेको कारण देखाउँदै पुरानो दर पुनरावलोकन गर्नुपर्ने जनाएको थियो।

यसैबीच, भारतीय विद्युत् बजारको डे अहेड मार्केटमा गत असोजको औसत बजार मूल्य प्रतियुनिट नेपाली ११ रुपैयाँ ७४ पैसा अर्थात् भारतीय ७ रुपैयाँ ३४ पैसा पुगेको थियो। बजार मूल्य बढेकै कारण यसअघि प्रस्तावित दरमा सम्झौता हुन नसकेको प्राधिकरणको भनाइ छ।

पुरानो प्रस्तावअनुसार सम्झौता हुन नसकेपछि प्राधिकरणले नयाँ प्रतिस्पर्धात्मक प्रक्रिया अघि बढाउन लागेको हो। अन्तर्राष्ट्रिय बोलपत्रमार्फत भारतीय विद्युत् व्यापारिक कम्पनीसँग प्रस्ताव माग गरी प्रतिस्पर्धी दरमा विद्युत् खरिद गर्ने प्राधिकरणको योजना छ।

प्रतिक्रिया दिनुहोस्