भोजपुरबाट काठमाडौंसम्म : कलाकार सुमन श्रेष्ठको संघर्ष र सफलताको कथा
काठमाडौं,असार ७ । कलाकारिता क्षेत्रमा सफलता हासिल गर्न प्रतिभासँगै निरन्तर मेहनत र धैर्य आवश्यक हुन्छ। यिनै गुणका कारण भोजपुरको बोखिममा जन्मिएका सुमन श्रेष्ठ आज नेपाली टेलिसिरियल तथा सर्ट फिल्म क्षेत्रमा परिचित नाम बन्न सफल हुनुभएको छ।
वि.सं. २०५० साल वैशाख १ गते बुवा जीवन श्रेष्ठ र आमा कमला श्रेष्ठको कोखबाट भोजपुरको बोखिममा जन्मिनुभएका सुमन हाल काठमाडौंलाई कर्मथलो बनाएर कलाकारिता यात्रामा सक्रिय हुनुहुन्छ। औपचारिक शिक्षा कक्षा ९ सम्म मात्रै हासिल गर्नुभएका उहाँले आफ्नो भविष्य भने कलाकारिता क्षेत्रमा खोज्नुभयो।
वि.सं. २०७४ सालबाट कलाकारिताको यात्रा सुरु गर्नुभएका श्रेष्ठले करिब नौ वर्षको अवधिमा नेपाली मनोरञ्जन क्षेत्रमा उल्लेखनीय योगदान दिनुभएको छ। अभिनयप्रतिको लगाव र निरन्तर मेहनतका कारण उहाँले हालसम्म दर्जनौं टेलिसिरियल तथा सर्ट मुभीमा अभिनय गरिसक्नुभएको छ।
उहाँको अभिनय यात्रा टेलिचलचित्रमार्फत सुरु भएको थियो। त्यसपछि लोकप्रिय टेलिसिरियलहरू ‘मेरी बास्सै’, ‘उल्टो–सुल्टो’, ‘अति भो’ लगायतका विभिन्न कार्यक्रम र सर्ट फिल्महरूमा आफ्नो अभिनय क्षमता प्रस्तुत गर्नुभयो। दर्शकमाझ फरक शैली र स्वाभाविक अभिनयका कारण उहाँले छुट्टै पहिचान बनाउन सफल हुनुभएको छ।
अभिनयमा मात्र सीमित नरही सुमनले निर्माण र निर्देशन क्षेत्रमा पनि पाइला चाल्नुभएको छ। उहाँले आफ्नै लगानी र निर्माणमा ‘अमर अजम्बरी’ नामक सर्ट मुभी निर्माण गर्नुभयो, जसले उहाँको सिर्जनात्मक क्षमतालाई थप उजागर गर्यो।
पछिल्लो समय उहाँ अभिनयसँगै सह–निर्देशकको भूमिकामा पनि सक्रिय हुनुहुन्छ। ‘हेला बिचलि’ लगायतका विभिन्न टेलिसिरियलमा सह–निर्देशनको जिम्मेवारी सम्हाल्दै आउनुभएका श्रेष्ठले नेपाली मनोरञ्जन उद्योगमा आफ्नो भूमिका थप विस्तार गरिरहनुभएको छ।
अब भने उहाँ आफ्नै निर्माणमा नयाँ टेलिसिरियल ‘सरिता’ निर्माण गर्ने तयारीमा हुनुहुन्छ। यस घोषणासँगै उहाँले अभिनय, निर्माण र निर्देशन तीनै क्षेत्रमा आफूलाई स्थापित गर्ने लक्ष्य लिएको देखिन्छ।
भोजपुरको ग्रामीण परिवेशबाट सुरु भएको सुमन श्रेष्ठको यात्रा आज नेपाली मनोरञ्जन क्षेत्रको महत्वपूर्ण हिस्सासम्म आइपुगेको छ। सीमित शैक्षिक पृष्ठभूमि हुँदाहुँदै पनि लगन, मेहनत र आत्मविश्वासका बलमा सफलता हासिल गर्न सकिन्छ भन्ने उदाहरणका रूपमा उहाँको जीवनयात्रा प्रेरणादायी बनेको छ।